VOV4.Xơ Đăng - Kơxo lơ 20/1, pôa Phạm Bình Minh, Ngế pro xiâm phŏ hnê mơhno má môi Chin phuh hiăng séa ngăn tơdroăng tơniăn gak kring, tơniăn tơƀai kơneăng ƀă tơdroăng hbrâ mơdât pơreăng COVID-19 a Tơraih tơƀai lâp plâi tơnêi Nội Bài.

Pôa Phạm Bình Minh, Ngế pro xiâm phŏ hnê ngăn tơnêi têa pêi cheăng ƀă Tơraih tơƀai lâp plâi tơnêi Nội Bài

Vâ tơniăn ƀă mơdât tơtro pơreăng COVID-19 tung tơdroăng pơto tơmối ƀă tơƀai, tơdah kuăn pơlê to tơƀai phiu ro tơdah Têt yương lĭch, Têt lo hơnăm nếo, mâu hâi xah hêi hơngui ƀă tung plâ hơnăm 2022, pôa Phạm Bình Minh pơkâ thế Khu xiâm pơkuâ rak tơniăn troăng prôk thâ pêi cheăng ƀă mâu khu râ kăn pơkuâ tơƀai mâu kong têa vâ môi tuăn mơdêk roh kơneăng tơƀai kơneăng troh lâp plâi tơnêi, tơxâng tiô tơdroăng kal vâ to tơƀai dêi kuăn pơlê vêh tơnêi têa lăm pôu dêi nhŏng o ƀă tơdah Têt lo hơnăm nếo.

Pôa Phạm Bình Minh pơkâ thế Kŏng ti xiâm tơraih tơƀai Việt Nam, mâu khu pơkuâ tơƀai pêi pro kơtăng mâu pơkâ ‘na gâk kring, tơniăn ƀă hbrâ mơdât pơreăng COVID-19.

A Sa Ly tơplôu ƀă tơbleăng