Pôa Phạm Minh Chính, Ngế pro xiâm hnê ngăn Chin phuh hôp tơpui tơno ƀă kăn xiâm pơkuâ kong têa Brazil
Thứ ba, 14:03, 26/09/2023
Tơplôu: Gương/VOV
Tơplôu: Gương/VOV
VOV4.Xơ Đăng - Kơxo hâi lơ 25/9 tiô chôu kong têa, pôa Luiz Inacio Lula da Silva, Kăn xiâm pơkuâ kong têa Brazil pơkuâ leh tơdah pôa Phạm Minh Chính, Ngế pro xiâm hnê ngăn tơnêi têa pin, klêi leh tơdah, pôa Phạm Minh Chính hiăng tơpui tơno ƀă Kăn xiâm pơkuâ kong têa Brazil.
A rôh hôp tơpui tơno, kăn xiâm pơkuâ kong têa Brazil loi khât hneăng lăm pôu kô veăng djâ tơdroăng tơrŭm ki sap ton nah ƀă tơrŭm tơniăn lĕm pơla péa tơnêi têa rế tâk ó tâ nếo tung la ngiâ, veăng ‘no hnoăng pro hơniâp lĕm, rak tơniăn, mơnhông a péa kơpong ƀă tung lâp plâi tơnêi.
Péa pâ vâ môi tuăn hlo tơrŭm cheăng pơla péa pâ pơtối mơnhông rế tơƀrê, pơxúa, malối tơdroăng kal kí, tơpui kâ, cheăng kâ tê mơdró, kring vế tơniăn cheăng lêng, pêi chiâk, khoa hok kŏng ngê̆, túa lĕm tro, hnê hriâm. Péa pâ vâ môi tuăn mơdêk tơrŭm tung lăm pôu, trâm mâ tơrá mâu kăn rêm râ a tâi tâng mâu râ Đảng, Tơnêi têa, Chin phuh, Kuô̆k hô̆i; tơrŭm pêi pro tro mâu tơdroăng cheăng vâ troh tơbâ 35 hơnăm mơjiâng tơrŭm tơpui kâ tung hơnăm 2024.
Viết bình luận