VOV4.Xơ Đăng Hâi lơ 8/2, klăng leh tơbâ 92 hơnăm hâi mơjiâng Đảng Kŏng san Việt Nam ƀă vêh pêi cheăng klêi kơ’nâi Têt Lo hơnăm nếo Nhâm Dần 2022. Pôa Phạm Minh Chính, Ngế pro xiâm hnê ngăn Chin phuh lăm pôu ƀă rơkâu Têt kăn ƀô̆, mơngế pêi cheăng Hngêi arak liăn Tơnêi têa Việt Nam ƀă kơvâ Hngêi arak liăn. Hơnăm 2021 Hngêi arak liăn Tơnêi têa Việt Nam hiăng tơbleăng ăm pêi pro troăng hơlâ pro mơdon hâi khế chêl liăn chĕn, vêh pơ’lêh hâi khế chêl liăn chĕn, kơdroh liăn rơkê, liăn mơ’no pêi cheăng.

Dâng 600 rơpâu pơ’leăng mâ kuăn pơlê mung ƀă kơxô̆ liăn chê̆n 280 rơpâu rơtal liăn hiăng pro mơdon hâi khế chêl liăn chĕn; vâ chê 2 rơtuh kuăn pơlê mung ƀă kơxô̆ liăn chĕn vâ chê 4 rơtuh rơtal châ kơdroh liăn rơkâ, kơdroh liăn rơkâ ăm mung, kơdroh lối 2.500 rơtal liăn kơxô̆ liăn chêl chĕn, ăm mung ƀă mâu ngế mung mơngế pêi cheăng, mơngế pêi cheăng ing Hngêi arak liăn kum rêh ối pơlê pơla.

Hơnăm 2022, tiô tối hdrối tơdroăng cheăng kâ lâp plâi tơnêi ƀă tung tơnêi têa pơtối ôh tá tơniăn ƀă ôh tá ‘nâi tối hdrối xua tơdjâk dêi pơreăng kân COVID-19. Ngế pro xiâm hnê ngăn tơnêi têa pơkâ thế kơvâ Hngêi arak liăn pơtối pơkuâ hbrâ, pêi cheăng ƀeăn rơkê, tơdâng mâu troăng hơlâ liăn, pêi pro châ tơƀrê mâu troăng tŏng kum pro tơniăn, mơnhông cheăng kâ, tŏng kum pro tơ’lêi hlâu ăm kuăn pơlê ƀă khu tê mơdró châ tơ’lêi hlâu mung liăn hngêi arak liăn vâ pro tơniăn ƀă mơnhông pêt mơjiâng tơmeăm, tê mơdró.

A Sa Ly tơplôu ƀă tơbleăng