Peăng xêi hâi lơ 19/10 a Pơlê kong kân Cần Thơ, pôa Phạm Minh Chính-Ngế pro xiâm hnê ngăn Chin phuh hiăng pơkuâ xiâm ‘na roh hôp tơpui tối ‘na pơkâ pêi mơjiâng troăng kân-tơdrăng a kơpong Tơbăng Cửu Long. Dế nôkố, tung kơppong ai 5 tơdroăng tơkêa bro troăng kân-tơdrăng tâi tâng xŏn lối 200km, tiô tối hdrối kô pêi pro klêi a mơ’nui hơnăm 2025, pơrá pêi pro tro hâi khế pơcháu, mâu tơdroăng ki xahpá, tơvâ tơvân, ối kreăng tung mơjiâng pro hiăng châ lêi tah.

Péa tơdroăng tơkêa bro troăng kân-tơdrăng pơla sap ing Cao Lãnh troh a Lộ Tẻ, ƀă ing Lộ Tẻ troh a Rạch Sỏi (xŏn dâng 80 km, kô mơjiâng pro kêi đeăng tung khế 10 kố. Mâu khu xiâm, kơvâ cheăng, kong pơlê, pơlê kong kân hiăng hbrâ rơnáu dêi kuăn mơngế, kế tơmeăm, rĕng văng mơgrúa mâu tíu ki vâ pro troăng, ăm thế kuăn pơlê ‘mâi rơnêu xĕn tíu ối. Ngế pro xiâm hnê ngăn tơnêi têa pơkâ thế ing mơ’nui hơnăm kố ah kô khŏm pêi pro klêi tâi tâng, thăm nếo, rĕng pro klêi ahdrối hâi khế hiăng pơcháu a kơpong Tơbăng kroăng Cửu Long, ngăn kố cho “tơdroăng pơklât thế, pói vâ dêi plâi nuih kuăn mơngế” ƀă pôu râng hnoăng cheăng ƀă pơlê pơla, cheăm bêng, kong pơlê tơná. Mâu tơdroăng tơkêa bro mê athế rak vế tro tiô luât ki hiăng vê hdró, pêi cheăng athế châ tơniăn, krá kâk, tơniăn ăm mơngế pêi cheăng ƀă hnối rak vế ngăn tơnêi tíu, hyôh kong prâi, veăng gum mơnhông rĕng, krá ton ăm kơpong tơbăng kroăng Cửu Long.