Ngế pro xiâm hnê ngăn tơnêi têa tối nhên, tơrŭm cheăng hiăng chiâng tơdroăng ki mơhnhôk kal mơdêk tung tơnêi têa, ‘mâi mơnhông tơnêi têa.  Tâi tâng kế tơmeăm tê ăm kong têa ê 7 khế hơnăm kố châ lối 514 rơtal dollar; kơxô̆ liăn ‘no pêi cheăng tơdrêng ing kong têa ê FDI chêh inâi ƀă pêi châ 24 rơtal dollar, mơnhông Việt Nam châ mot tung 15 khu kong têa dế mơnhông tơbrê  tơ’mot FDI hên má môi tung lâp plâi tơnêi.

Tơrŭm cheăng xuân mơdêk pê klê luât pơkâ tung tơnêi têa, mê cho pơ’lêh  pêi mâu tơdroăng tơhrâ ƀă lâp plâi tơnêi, mơdêk ki rơdêi ƀă rơkong tơpui dêi Việt Nam a ngiâ mâu kong têa tung lâp plâi tơnêi. Ngế pro xiâm hnê ngăn tơnêi têa tối thâ mơjiâng Pơkâ dêi Kuô̆k hô̆i ‘na luât pơkâ, luât tŏng gum kal khât tung tŏng gum cheăng tung tơrŭm cheăng; tơkŭm tah tíu ki pá ‘na luât, luât pơkâ tŏng gum, pro tơƀrê vâ tơrŭm cheăng lâp plâi tơnêi  chiâng tơdroăng ki mơ-eăm mơnhông tơbrê.