Kơmăng hâi lơ 7/10, a tíu pêi cheăng Chin phuh, pôa Phạm Minh Chính - Ngế pro xiâm hnê ngăn Chin phuh pơkuâ rôh Hôp má 16 Khu hnê mơhno cheăng dêi Tơnêi têa ‘na hbrâ mơdât tơnăng ká ki ôh tá tro luât, ôh tá vâ tối tơbleăng hdrối ƀă ôh tí vâ pro tro tiô pơkâ (IUU).  

Rôh hôp châ mơ’no tơdrêng tiô troăng hyôh troh 21 to kong pơlê, pơlê kong kân kĭng têa kơxĭ. Pôa Phạm Minh Chính - Ngế pro xiâm hnê ngăn tơnêi têa khĕn kơdeăn tơdroăng pêi cheăng kơtăng khât dêi mâu khu xiâm, kơvâ cheăng, kong pơlê tung tơdroăng mơdêk, tâk theh trĭng IUU.

Sap ing măng tĭng hdrối troh nôkố, tăng ngăn nếo mâu tuk ki hâi châ ăm hlá mơ-éa phêp kơdroh; tuk tơnăng ká ki ôh tá ai tŭm hlá mơ-éa tiô pơkâ iâ há lăm tơnăng ká; tuk ai krâ ‘măn tơmeăm séa ngăn, tí tăng ngăn video rơkê plĕng rế tâk; la hâi tâng tối tơ’nôm tuk tơnăng ká hía hyôh măng ki hrik tơdjêp, luât tơdroăng pơkâ a têa kơxĭ; hâi tâng tối ai tơ’nôm tuk tơnăng ká pro xôi luât a kơpong têa kơxĭ pakĭng tơdroăng châ rup pơxâu phâk ƀă hía hé...

Tối nhên tơdroăng thế pêi kơtăng tơplâ ƀă mâu tuk tơnăng ká ôh tá ai hlá mơ-eá ăm phêp tiô pơkâ IUU, mâu tơdroăng ôh tá tơdrăng, lơ ví ôh tá vâ pro hnoăng mơhá... Ngế pro xiâm hnê ngăn tơnêi têa tối tâng kal luât pơkâ, Khu xiâm ngăn chiâk deăng ƀă Hyôh kong prâi rơtế ƀă mâu kong pơlê pêi pro pơkâ thế, pơtroh ăm Chin phuh vâ pơxâu phâk kơtăng hlối tơdroăng mê.