Tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa ăm ‘nâi, sap ing apoăng hneăng troh nôkố, Chin phuh hiăng tơkŭm po 42 rôh hôp chuyên ki kal ‘na mơjiâng luât, tung mê, sap ing apoăng hơnăm 2025 troh nôkố, hiăng tơkŭm po 09 rôh hôp; séa ngăn, ăm rơkong tơpui dâng 80 hồ sơ tơdroăng tơkêa luât, tơdroăng pơkâ.

Tiô tối hdrối a Hneăng hôp má 10, Kuô̆k hô̆i hneăng 15, Chin phuh kô pơtroh ăm Kuô̆k hô̆i dâng 113 hồ sơ, mơéa ki kal, tung mê ai 47 tơdroăng tơkêa luât, tơdroăng pơkâ. Hâi khế cho sap ing nôkố troh pơxiâm po Hneăng hôp rôh má 10, ôh ti ton xếo, tơdroăng cheăng kal hbrâ rơnáu hên, Ngế pro xiâm hnê ngăn tơnêi têa tối tiah kố, hnoăng cheăng, pơkâ mơ’no hên, kơlo cheăng ôh tá tơniăn.

Xua mê pơkâ thế khŏm mơeăm hên, pêi pro kơtăng, tơƀrê vâ pêi pro klêi tơdroăng pơkâ pêi tung tơdroăng cheăng mơjiâng, pêi pro klêi troăng pơkâ, ki hdrối tâ athế rak tơniăn tro ‘na ki rơkê, teăm pêi klêi mâu pơkâ luât, tơdroăng pơkâ pơtroh ăm Kuô̆k hô̆i tơbleăng.