VOV4.Xơ Đăng - Hâi lơ 30/3/2022, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng tơdah pôa Marc Evans Knapper, Kăn teăng mâ Mih a Việt Nam troh koh hmât trâm mâ tơpui tơno klăng roh Kăn teăng mâ pơxiâm hneăng pêi cheăng. A roh tơdah, Ngế pro xiâm hnê ngăn tơnêi têa rơkâu pôa Marc Evans Knapper hiăng châ pôa Joe Biden, Kăn xiâm pơkuâ kong têa Mih pơcháu hnoăng cheăng nếo ƀă vêh a Hà Nội pêi cheăng drêng to pro Kăn teăng mâ; tối loi tơngah drêng pôu râng hnoăng cheăng nếo, Kăn teăng mâ kô pơtối veăng kum hên tâ mê nếo ăm tơrŭm cheăng ki kal má môi dêi Việt Nam ƀă Việt Nam pói vâ rơtế Mih pơtối djâ tơrŭm cheăng tŭm têk prôk trâu hơngế, châ tơƀrê, păng ‘nâng tiô tơdroăng nhuô̆m tơniăn krê, hnoăng pơkuâ, tâi tâng tơnêi tơníu, mâu pơkâ ‘na tơdroăng kal kí ƀă tơdroăng ki phá tơ-ê dêi pó.

Kăn teăng mâ Mih tối phiu ro châ vêh pêi cheăng a Việt Nam, kheăn kơdeăn tơdroăng mơnhông mơdêk ó rơdêi dêi Việt Nam tung rêm kơvâ cheăng, ki má lối cho tơdroăng hbrâ mơdât pơreăng ƀă pro tơniăn mơnhông mơdêk cheăng kâ klêi kơ’nâi tâi pơreăng.

A Sa Ly tơplôu ƀă tơbleăng