Pôa Phạm Minh Chính vêh mơnhên tối ƀă kơdeăn khĕn pôa Kohdayar Marri  sap ing hâi ki pơxiâm tơdah xo hnoăng cheăng hiăng kơhnâ khât tung hnoăng cheăng thăm mơdêk tơrŭm cheăng pơla Việt Nam - Pakistan, ki rơhêng vâ tối, ‘na kơvâ khôi túa lĕm tro, ngê̆ thuât, ‘na tơdroăng khôp, ing mê, veăng gum thăm mơdêk hlê plĕng dêi pó pơla péa pâ tơnêi têa. Ngế pro xiâm hnê ngăn Chin phuh mơnhên tối, Việt Nam prế Pakistan ai hên hnoăng cheăng ki tơrŭm kơhnâ khât vâ mơnhông tơdroăng tơrŭm cheăng pơla péa pâ thăm rế păn ‘nâng tâ, luâ tâ, veăng gum ăm tơdroăng ki pro hơniâp lĕm, krá tơniăn ƀă mơdêk tơrŭm pơla peá kơpong Nam Á ƀă Đông Năm Á, xuân môi tiah ăm tâi tâng kơpong châu Á-Thái Bình Dương ƀă Ấn Độ Dương tối tơdjuôm.

Ngế pro xiâm hnê ngăn xuân pơkâ thế péa pâ thăm mơdêk tơrŭm cheăng kâ-tê mơdró, mơ’no liăn cheăng, tŏng gum tơmeăm khoăng, ing mê, mơnhông mâu hnoăng cheăng ki ó rơdêi dêi peá pâ tơnêi têa, khŏm kơdôu mơ-eăm hên tâ vâ tơrŭm pêi cheăng kâ, tê mơdró kâ pơla péa pâ châ lối 1 rơtal USD; tơdrêng amê, po rơdâ tơrŭm cheăng tung mâu kơvâ túa lĕm tro, hnê hriâm hnê mơjiâng tuăn ngôa rơkê, ôm hyô, tơrŭm pơla kuăn pơlê.