VOV4.Xơ Đăng - Kơxê lơ 20/1, pôa Phạm Minh Chính, Ngế pro xiâm hnê ngăn Chin phuh hiăng tơdah pôa Choi Joo Ho, kăn xiâm pơkuâ Tôh tơrŭm Samsung Việt Nam. A rôh tơdah, pôa Phạm Minh Chính tối nhên, tơrŭm cheăng la ngiâ pơla Việt Nam – Hàn Quốc dế pơtối mơnhông tơniăn lĕm ki tơrŭm pêi cheăng, ‘no liăn dêi Samsung cho môi tơdroăng ki mơhno tối nhên.

Ngế pro xiâm hnê ngăn tơnêi têa mơnhên tối khât tơdroăng cheăng tê mơdró châ tơƀrê dêi Grup pơkuâ a Việt Nam tung pơla xơpá xua pơreăng, malối tâi tâng kơxô̆ liăn châ xo a hơnăm 2021 sap ing mâu tơdroăng ki tê mơdró ƀă tê ngi kong têa ê tâk dâng 14% tâng vâ pơchông ƀă khế kố hơnăm 2020, châ lối 74 rơtal dollars.

Ngế pro xiâm hnê ngăn tơnêi têa xuân mơnhên tối khât tơdroăng ki Samsung ngăn Việt Nam cho tơnêi têa ki xiâm tung lâp plâi ƀă tơdroăng ki ‘no liăn cheăng kơtăng, ton xŏn.

Katarina Nga tơplôu ƀă tơbleăng