Kơxê lơ 21/10, pôa Phạm Minh Chính, Ngế pro xiâm hnê ngăn tơnêi têa hiăng tơpui phôn ƀă pôa (A-ni-tin Shan-vai-ra-kun) Anutin Charnvirakul - Ngế pro xiâm hnê ngăn kong têa Siam. Péa kăn xiâm pơkuâ phiu ro hdrối tơdroăng péa tơnêi têa mơdêk tơrŭm cheăng To khu tơrŭm cheăng ton xŏn tâi tâng a khế 5/2025; mơnhên tơrŭm cheăng Việt Nam - Siam dế mơnhông ó rơdêi, châ tơƀrê tung hên kơvâ cheăng.

Ngế pro xiâm hnê ngăn Chin phuh mơnhên Việt Nam kô pơtối tơpui tơno ăm khu tê mơdró kong têa Siam mơ’no liăn cheăng, tê mơdró châ tơƀrê a Việt Nam; tơdrêng amê pói vâ péa pâ mơdêk tơdjêp troăng klông, tơrŭm gâk kring, khôi túa lĕm tro, hnê hriâm ƀă trâm mâ kuăn pơlê. Ngế pro xiâm hnê ngăn kong têa Siam môi tuăn hên, tối rơdêi ki kal tơrŭm krá tơniăn vâ rĕng djâ pêi lo liăn tê mơdró pơla péa pâ châ 25 rơtal dollars rêm hơnăm, tơdrêng amê pói vâ ai tơ’nôm hên khu tê mơdró Việt Nam mơ’no liăn cheăng a kong têa Siam tung mâu kơvâ kơmăi kơmok, pêi chiâk deăng ƀă kŏng ngê̆ rơxông nếo.