VOV4.Xơ Đăng - A rôh trâm mâ khu kơtu ƀâ long vâi kơdrâi tơnêi têa kơxê lơ 10/1, pôa Phạm Minh Chính, Ngế pro xiâm hnê ngăn Chin phuh tối nhên: Ƀă mâu tơdroăng ki kơhnâ, tơdroăng ki mơ-eăm, tơdroăng ki tơkâ luâ vâ rôh apoăng sap nah tá hâi chói ai Khu kơtu ƀâ long vâi kơdrâi tơnêi têa dêi pin hiăng châ ƀlêi tơdroăng ki veăng tung rôh tơ’noăng World Cup 2023, á kô khĕn kố cho mâu vâi droh ki kơnía ƀă “ngế ki hnê kơtu kơnía” dêi tơ’noăng ivá Việt Nam.

Mâu ngế ki tung khu kơtu ƀâ long vâi kơdrâi Việt Nam rơtế dêi rơpó xup um

Pôa Phạm Minh Chính tối nhên, tơdroăng ki khu kơtu ƀâ long vâi kơdrâi tơnêi têa châ veăng tơ’noăng tung World Cup cho hnoăng cheăng ki kân má môi sap nah tá chói ai ‘na kơtu ƀâ long Việt Nam. Tơdroăng kố cho tơdroăng ki hơniâp ro ăm lâp tơnêi têa tung mâu hâi ki apoăng hơnăm nếo. Ngế pro xiâm hnê ngăn tơnêi têa tối tiah kố Khu kơtu ƀâ long đi đo rak vế ivá khŏm mơdêk vâ tơ’noăng rơkê má môi a mâu rôh tơ’noăng ki pơtối, ki hdrối tâ cho rak vế ƀlêi chiâng “tíu ki xiâm” a SEA GAMES 31 a khế 5 la ngiâ.

Xuân a rôh trâm mâ, kăn teăng mâ Ƀơrô cheăng Chin phuh diâp 4,5 rơtal liăn cho kơxô̆ liăn sap ing pơlê pơla; Vi ƀan Olympic Việt Nam diap 3,6 rơtal liăn; Hngêi rak liăn ‘No liăn cheăng ƀă mơnhông Việt Nam diâp 2 rơtal liăn, Grup pơkuâ TH diâp 1,5 rơtal liăn tung mê ai 1 rơtal liăn mâ ƀă kế tơmeăm diâp ăm Khu kơtu ƀâ long vâi kơdrâi Tơnêi têa Việt Nam.

Katarina Nga tơplôu ƀă tơbleăng