VOV4.Xơ Đăng - Kơxo lơ 7/3, pôa Phạm Minh Chính, Ngế pro xiâm hnê ngăn Chin phuh trâm mâ mâu kơdrâi pro kăn hnê mơhno, pơkuâ, mâu ngế rơkê ƀă mâu ngế pêi cheăng ‘na văn hok, ngê̆ thuât ki rơkê klăng Hâi Lâp plâi tơnêi vâi kơdrâi 8/3. A roh trâm mâ, pôa Phạm Minh Chính teăng mâ khu râ kăn pơkuâ hnê mơhno Đảng, Tơnêi têa pơtroh rơkong rơkâu lĕm tro má môi troh vâi kơdrâi pro kăn pơkuâ hnê mơhno, pơkuâ, mâu ngế rơkê ƀă mâu ngế pêi cheăng văn hok, ngê̆ thuât, vâi kơdrâi tung lâp tơnêi têa klăng Hâi lâp plâi tơnêi vâi kơdrâi 8/3.

Ngế pro xiâm hnê ngăn tơnêi têa xuân pơtroh rơkong pâ mơnê ki má môi troh mâu vâi kơdrâi pro ƀok thái pơkeăng, mơngế pêi cheăng khăm pơlât ƀă mâu nâ o kơdrâi pêi cheăng a tiú hbrâ mơdât pơreăng COVID-19; rơtế hên nâ o vâi kơdrâi pêi cheăng ki, kơvâ pêi cheăng, hriâm tâp, pêi cheăng tơdroăng cheăng ki ê.

Ngế pro xiâm hnê ngăn tơnêi têa tối nhên, kal pơtối mơdêk ki hôm pêi cheăng dêi mâu râ khu pơkuâ vâi kơdrâi tung hneăng nôkố, tŏng kum vâi kơdrâi mơnhông mơdêk cheăng kâ, mơdêk tuăn ngôa rơkê, veăng rế hiá rế hên tâ tung mâu tơdroăng pêi cheăng kal kí - rêh ối pơlê pơla, vâ nâ o veăng kum hên tâ mê nếo, châ tơƀrê tâ mê nếo tung tơdroăng pơ’lêh nếo, mot tơrŭm ƀă mơnhông mơdêk tơnêi têa.

A Sa Ly tơplôu ƀă tơbleăng