VOV4.Xơ Đăng - Kơxê hâi lơ 15/3/2022, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng trâm mâ tơpui tơno ƀă pôa Julius Maada Bio, Kăn xiâm pơkuâ kong têa Kŏng hoa Sierra Leone. Ngế pro xiâm hnê ngăn tơnêi têa kheăn kơdeăn mâu tơdroăng mơnhông mơdêk lĕm tro tung tơrŭm pơla péa tơnêi têa. Péa tơnêi têa ối hên tơmeăm vâ mơnhông vâ mơdêk tâ mê nếo tơrŭm cheăng, ki má lối cho tung kơvâ tê mơdró, mơ’no liăn cheăng, pêi chiâk deăng, kŏng ngê̆, hnê hriâm – hnê mơjiâng, gak kring, cheăng lêng, trâm mâ tơpui tơno kuăn pơlê ƀă hía hé.

Pôa Phạm Minh Chính, Ngế pro xiâm hnê ngăn tơnêi têa trâm mâ tơpui tơno ƀă Kăn xiâm pơkuâ kong têa Kŏng hoa Sierra Leon

Ngế pro xiâm hnê ngăn tơnêi têa pơkâ thế mâu Khu xiâm, kơvâ cheăng, khu tê mơdró péa pâ kal tơrŭm krá tơniăn, pêi pro châ tơƀrê mâu tơdroăng môi tuăn tung tơrŭm cheăng tung mâu kơvâ cheăng ki ai tơmeăm mơnhông mơdêk, pro xiâm kối vâ po rơdâ mâu kơvâ ki ê.

Pôa Phạm Minh Chính prế pôa Julius Maada Bio loi tơngah tơrŭm pơla Việt Nam ƀă Sierra Leon kô đi đo mơnhông mơdêk xua pơxúa dêi kuăn pơlê péa tơnêi têa, xua hơniâp lĕm ƀă mơnhông mơdêk tung kơpong ƀă tung lâp plâi tơnêi.

A Sa Ly tơplôu ƀă tơbleăng