Kơxo hâi lơ 25/7, pôa Phạm Minh Chính, Ngế pro xiâm hnê ngăn Chin phuh veăng Hôp tơbleăng Pơkâ hdró kong ƀă mơhnhôk ‘no liăn cheăng a kong pơlê Long An. Hneăng hôp tơbleăng Pơkâ ƀă mơhnhôk ‘no liăn cheăng kong pơlê Long An cho môi tơdroăng ai pơxúa kân ƀă tơdroăng tơbleăng pêi tiô pơkâ mơnhông cheăng kâ rêh ối dêi Long An tung la ngiâ. A hneăng hôp, pôa Nguyễn Chí Dũng, Ngế xiâm Pơkâ ƀă ‘no liăn cheăng hiăng pơkâ Hdró kong pơlê pơla hơnăm 2021-2030, mâu tơdroăng vâ pêi troh hơnăm 2050 ăm mâu kăn kong pơlê Long An.

Tơbleăng a hneăng hôp, pôa Phạm Minh Chính, Ngế pro xiâm hnê ngăn tơnêi têa tối nhên, Long An tơkŭm hên tơmeăm khoăng ai hlâu vâ mơnhông cheăng kâ rêh ối rĕng ƀă krá tơniăn, cho tíu ki tơtro vâ troh ƀă mâu khu ‘no liăn cheăng tung tơnêi têa ƀă kong têa ê. Kong pơlê Long An kal mơ-eăm troh hơnăm 2030, cho tíu xiâm mơnhông cheăng kâ rơkê , krá tơniăn dêi kơpong peăng Hdroh.

Xuân tung hâi lơ 25/7, pôa Phạm Minh Chính rơtế ƀă mâu kăn ki pêi cheăng dêi Chin phuh lăm séa ngăn tơdroăng tơkêa bro troăng kân pa kĭng 3 pơlê kong kân Hồ Chí Minh tơkâ luâ Long An. Tơdroăng mơjiâng pro klêi troăng pakĭng 3 Pơlê kong kân Hồ Chí Minh ƀă pơkâ tơdjêp ƀă mâu kong pơlê, pơlê kong kân kơpong cheăng kâ ki xiâm tíu peăng Hdroh tơnêi têa, mơjiâng kơphô̆ ki lĕm, krá tơniăn, veăng mơnhông cheăng kâ - rêh ối dêi tơnêi têa.