VOV4.Xơ Đăng - Kơmăng lơ 27/2, pôa Phạm Minh Chính, Ngế pro xiâm hnê ngăn Chin phuh veăng ƀă xông tơpui a Tơdroăng leh tơbâ Hâi ƀok thái pơkeăng Việt Nam lơ 27/2 ‘’Lêng ếo rơbông’’. Pôa Phạm Minh Chính teăng mâ khu râ kăn pơkuâ Đảng, Tơnêi têa pơtroh rơkong rơkâu, mơnê trâu hơhngế troh ƀok thái pơkeăng, mâu ngế pêi cheăng khăm pơlât tung lâp tơnêi têa, mâu ngế pơtối pro tơdroăng ki kơnía lĕm dêi kơvâ khăm pơlât; ki má lối cho drêng tâi tâng hdroâng mơngế tơkâ hluâ pá puât, krá tơniăn tơkâ hluâ pá puât, môi tuăn mơno tơplâ mơdât pơreăng COVID-19.

Pôa Phạm Minh Chính, Ngế pro xiâm hnê ngăn tơnêi têa xông tơpui a Tíu pêi cheăng

Ngế pro xiâm hnê ngăn tơnêi têa tối rơdêi, Khu râ kăn pơkuâ Đảng, Tơnêi têa, mâu khu pơkuâ Đảng ƀă khu râ kăn pơkuâ mâu râ, tâi tâng kuăn pơlê đi đo kheăn kơdeăn, hlê plĕng ƀă veăng kum drêng trâm pá, tơbrêi tơbrêh, tơdroăng ki pleăng hnoăng cheăng dêi kơvâ khăm pơlât, ƀok thái pơkeăng ƀă mâu ngế pêi cheăng khăm pơlât. Ngế pro xiâm hnê ngăn tơnêi têa pơkâ mâu râ, mâu kơvâ cheăng, kong pơlê ƀă kơbông krếo kuăn pơlê lâp tơnêi têa pơtối thăm pâk pơkeăng vaccine, tung mê thăm pâk vaccine ăm vâi hdrêng tơniăn, châ tơƀrê vâ rak vế ivá mâu muăn ƀă kum mâu muăn vêh hriâm a hngêi trung tơniăn.

A Sa Ly tơplôu ƀă tơbleăng