VOV4.Xơ Đăng - Kơxo lơ 3/4, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa pơkuâ hneăng hôp tơpui tơdroăng xúa on tơhrik ƀă tơdroăng ăm kơchâ, hyôh ăm pêi cheăng pro ‘na on tơhrik. Tơbleăng a hneăng hôp, pôa Phạm Minh Chính tối nhên, on tơhrik cho 1 tung 5 tơdroăng ki kân ki pin thế rak tơniăn vâ ‘mâi mơnhông rĕng ƀă mơnhông cheăng kâ - rêh ối krá tơniăn. Tung hơnăm hdrối, rơtế ƀă hên tơdroăng mơnhông cheăng kâ-rêh ối; klêi pơ’lêh rêh ối hmâ tơniăn ƀă pơreăng COVID-19, ‘mâi mơnhông, mơdêk cheăng kâ-rêh ối, mơngế kal vâ xúa on tơhrik rế hên, môi tiah mơngế kal vâ xúa on tơhrik a tơnêi têa pin rế tâk.

Pakĭng mê, tơdroăng mung, yă on tơhrik lâp plâi tơnêi ôh tá tơniăn. A hneăng hôp, mâu Ngế pro xiâm phŏ hnê ngăn tơnêi têa, teăng mâ mâu khu xiâm, kơvâ cheăng, tíu pêi cheăng hiăng tơpui tơno tơbleăng mâu tơdroăng; tối mâu troăng rơhlâ vâ tơleăng mơnhên tơkâ luâ xơpá, pơloăng mơnúa; tối tơdroăng tơrŭm pơla mâu khu xiâm kơvâ cheăng, kơ koan, tíu pêi cheăng vâ rak tơniăn  mơnhông cheăng kâ - rêh ối tung la ngiâ. Tơbleăng tối mơgêi a hneăng hôp, pôa Phạm Minh Chính kal thế tơbleăng troăng rơhlâ vâ rak tơniăn tơdâng tơ’mô ki kân ‘na on tơhrik, tơdroăng cheăng pơkuâ ngăn, tơrŭm pêi, ‘mâi hơ’lêh tơ-tro, tơ-brê. Pơkâ cho rak tơniăn tơdâng tơ’mô kân ‘na on tơhrik vâ châ tơniăn ton.

Gương tơplôu ƀă tơbleăng