VOV4.Xơ Đăng -  Kơxê lơ 5/4, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh tơdah jâ Érika Mouynes, Ngế xiâm tơpui kâ kong têa Panama koh trâm mâ tơpui tơno klăng roh lăm pôu pêi cheăng Việt Nam sap hâi lơ 4 – 6/4. ‘Na tơrŭm péa tơnêi têa, Ngế pro xiâm hnê ngăn Chin phuh pói vâ péa tơnêi têa pơtối tơrŭm krá tơniăn, châ tơƀrê vâ Panama chiâng kông tơdjêp kum djâ tơmeăm khoăng Việt Nam a kong têa Mih Latinh, ƀă tơrôu, Việt Nam cho kong têa vâ tơmeăm Panama châ tê tung peăng mâ hâi lo pá hdroh châu Á.

Vâ tơrŭm pơla péa tơnêi têa thăm châ tơƀrê ƀă tơtro tâ, pôa Phạm Minh Chính pơkâ thế Khu xiâm tơpui kâ ƀă mâu Khu xiâm, kơvâ cheăng péa tơnêi têa thăm tơpui tơno pơla khu râ kăn xiâm, trâm mâ pakĭng mâu hneăng hôp lâp plâi tơnêi, mơnhông mơdêk châ tơƀrê troăng tơpui ‘na kal kí râ Ngế xiâm phŏ tơpui kâ ƀă Vi ƀan tơrŭm cheăng kâ, tê mơdró ƀă mơ’no liăn cheăng Việt Nam – Panama; thăm tơrŭm tung mâu kơvâ cheăng péa pâ ai hên tơmeăm vâ mơnhông tơtêk môi tiah tê mơdró, pơto tơmeăm khoăng troăng têa kơxĭ.

A Sa Ly tơplôu ƀă tơbleăng