VOV4.Xơ Đăng - Kơxê lơ 23/1, a kong pơlê Vĩnh Long, pôa Phạm Minh Chính, Ngế pro xiâm hnê ngăn Chin phuh ƀă pôa Võ Văn Thưởng, Kăn pơkuâ hnê mơhno má môi tơdroăng cheăng Đảng hiăng troh chôu nhâng, pleăng hơvĭng reăng a kơpong tơbâ pôa Phạm Hùng, Kăn xiâm hnê ngăn Hô̆i đong Ngế xiâm ƀă pôa Võ Văn Kiệt, Ngế pro xiâm hnê ngăn Chin phuh. Ngế pro xiâm hnê ngăn tơnêi têa rơtế khu râ kăn pêi cheăng hiăng pleăng hơvĭng reăng, chôu nhâng, mơdoh môi phut tu ko vâ tơbâ hnoăng kân kĭn dêi pôa Phạm Hùng ƀă pôa Võ Văn Kiệt – péa ngế ki rơkê dêi kong pơlê Vĩnh Long hiăng pleăng hên hnoăng cheăng ăm tơdroăng tơplâ tơleăng lĕm hdroâng mơngế, mơjiâng ƀă gak kring Tơnêi têa.

Roh kố, Ngế pro xiâm hnê ngăn tơnêi têa rơtế ƀă khu râ kăn pêi cheăng hiăng troh lăm pôu ƀă rơkâu Têt kŏng nhân dêi kơpong hngêi kơmăi kơmok Hòa Phú, tơring Long Hồ, kong pơlê Vĩnh Long; rơkâu Têt, diâp kơxuô tơmeăm ăm mâu rơpŏng ai troăng hơlâ tŏng kum, rơpŏng kơtiê ƀă mâu rơpŏng tro tơdjâk râ ó xua pơreăng COVID-19 ƀă diâp 100 toăng hngêi ăm mâu rơpŏng pá puât dêi tơring Vũng Liêm ƀă tơring Tam Bình.

A Sa Ly tơplôu ƀă tơbleăng