Tiah mê, séa ngăn Pơkâ kơxô̆ 243 hâi 24/01/2025 dêi Khu xiâm pơkuâ tơdroăng kal kí ‘na mơjiâng Đảng ƀô̆ Chin phuh, Đảng ủi Chin phuh hiăng pơkâ mâu Pơkâ mơjiâng 15 Đảng ƀô̆ ối tung Đảng ƀô̆ Chin phuh, tung mê, ai Đảng ƀô̆ mâu kơ koan: Mơjiâng luât, Kơmăi kơmok ƀă tê mơdró, Túa lĕm tro, Tơ’noăng ivá ƀă Ôm hyô, Tơpui kâ, Khăm pơlât, Hnê hriâm ƀă Hnê mơjiâng tuăn ngoâ rơkê, Liăn ngân, Mơjiâng pro kế tơmeăm khoăng, pêi chiâk deăng ƀă hyôh kong prâi, Khoa hok ƀă Kong ngê̆, khu ngăn kong pơlê ƀă hnoăng cheăng mâu kăn ƀô̆, Khu ngăn hdroâng kuăn ngo ƀă loi tĭng, Hngêi rak liăn Tơnêi têa, Khu séa ngăn Chin phuh ƀă Đảng ƀô̆ mâu Kơ koan tí tăng ‘nâi plĕng, gum 15 Đảng ƀô̆ ối tung Đảng ủi Chin phuh.

Tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa pơkâ thế mâu Đảng ƀô̆ ối tung Đảng ủi Chin phuh rĕng séa ngăn tŭm kơ koan Đảng ối tung Đảng ủi Chin phuh ƀă xoăng cheăng tiô tơdroăng pơkâ Đảng; pêi pro klêi kơ koan cheăng tung dế; mơjiâng túa pêi cheăng ngăn tung 5 túa pơkuâ dêi Đảng ƀă ngăn tung tơdroăng pơkâ dêi Đảng; Tơkŭm tung Hneăng hôp Đảng rêm râ sap ing chi ƀô̆ ngi klêng tiô hnê mơhno kơxô̆ 35 dêi Khu xiâm pơkuâ tơdroăng kal kí; Đảng ƀô̆ pêi cheăng tung tơdroăng dêi Đảng pơkuâ tŭm têk ƀă pôu râng dêi hnoăng cheăng tơdjuôm.