Kơxê lơ 2/2, (hâi má 5 Têt), a Lạng Sơn, tung tơdroăng koh phiu ro Leh tơbâ 95 hơnăm hâi mơjiâng Đảng Kŏng san Việt Nam (3/2), lâp tơnêi phiu ro Hơngui Ất Tỵ, Pôa Phạm Minh Chính, Ngế pro xiâm hnê ngăn tơnêi têa pơkuâ roh hôp ƀă mâu khu xiâm, kơvâ cheăng, kong pơlê ‘na tơdroăng mơdêk rĕng mâu tơdroăng tơkêa bro troăng kân ăm phêp rơxế kơtâu têi Đồng Đăng (Lạng Sơn) – Trà Lĩnh (Cao Bằng) ƀă Tíu tê mơdró ngi lâp plâi tơnêi Hữu Nghị - Chi Lăng.

Ngế pro xiâm hnê ngăn tơnêi têa hiăng pơtê chêng a 4 tíu mơjiâng pro troăng kân péa tơdroăng tơkêa bro kố, mơhnhôk, diâp kơxuô tơmeăm Têt kăn ƀô̆, kŏng nhân a kông trương. Vêh mơnhên pơkâ kêi đeăng 2 troăng kân ăm phêp rơxế kơtâu têi kố tung hơnăm 2025 vâ veăng kum chiâng prôk troăng kân ăm phêp rơxế kơtâu têi Cao Bằng troh Cà Mau tung hơnăm kố, Ngế pro xiâm hnê ngăn tơnêi têa phiu ro hiâm mơno, tơdroăng pêi cheăng plâ Têt a kông trương 2 tơdroăng tơkêa bro troăng kân.

Ngế pro xiâm hnê ngăn tơnêi têa kheăn kơdeăn ƀă pơkâ khu mơ’no liăn cheăng, mâu khu ki tơdah tơdroăng mơjiâng pro troăng kân thế pơtối mơ’no ivá mơ-eăm, tơkâ hluâ dêi tơná vâ tơtêk, mơnhông; thăm pơtroh hên ngế pêi cheăng, kơmăi kơmok, mơjiâng pro; thăm xúa khoa hok kŏng ngê̆, pơhlêh nếo tơmiât pêi rơkê; tơniăn lĕm a kông trương; tơniăn tơdroăng mơjiâng pro ƀă mơ-eăm tơkâ hluâ tơdroăng pêi pro ƀă mơdêk ki dâi lĕm troăng kân.