VOV4.Xơ Đăng - Hâi lơ 16/3, pô Phạm Minh Chính, Ngế pro xiâm hnê ngăn tơnêi têa pêi cheăng ƀă Grup pơkuâ hrik têa châu Việt Nam (PVN) ‘na tơdroăng cheăng pêi tung hơnăm 2021, 2 khế apoăng hơnăm 2022 ƀă pơkâ hơnăm 2022. Mơnhông mơdêk mơgêi hneăng hôp, pôa Phạm Minh Chính tối, Chin phuh, Ngế pro xiâm hnê ngăn Chin phuh ing tơrêm mâu rơxông xuân tơmâng khât troh PVN vâ grup mơnhông tơniăn, pêi cheăng tro ƀă rế tơ-ƀrê.

Pôa Phạm Minh Chính, Ngế pro xiâm hnê ngăn tơnêi têa pêi cheăng ƀă Grup hrik chuâ on tơhrik Viêt Nam

Ngế pro xiâm hnê ngăn tơnêi têa môi tuăn ƀă tơdroăng pơkâ, pâ thế dêi PVN a rôh pêi cheăng. tung mê, ai mâu tơdroăng hiăng ƀă dế pơtối pêi pro. Ƀă mâu tơdroăng hiăng châ ăm hlá mơ-éa phêp xúa troăng rơhlâ tơleăng mơnhên, mê PVN kal tơrŭm krá ƀă mâu kơvâ cheăng, kơ koan tơleăng mơnhên klêi tơdroăng pêi pro ki nhên.

Ngế pro xiâm hnê ngăn tơnêi têa pơkâ thế kăn xiâm PVN mơhnhôk mâu kăn ƀô̆, mâu cheăng ăm tơnêi têa, mâu ngế pêi cheăng pơtối môi tuăn dêi rơpó, tơrŭm dêi rơpó, mơ-eăm tơkâ luâ xơpá pơloăng mơnúa rơtế ƀă Đảng, Tơnêi têa ƀă kuăn pơlê tơleăng mơnhên tơdroăng ki kal cho tơniăn rơdâng ƀă têa châu, on tơhrik lâp luô ahdrối ƀă ton ta ah, veăng ‘no hnoăng mơjiâng cheăng kâ krá tơniăn, pơkuâ krê dêi xêh.

Gương tơplôu ƀă tơbleăng