Tiô tối tơbleăng, 6 khế apoăng hơnăm 2023 tơdroăng mơnhông cheăng kâ rêh ối pơlê pơla dêi kong pơlê châ tơƀrê tung mâu tơdroăng ki kal, tâi tâng kế tơmeăm a kong pơlê tâk 3,43%. Tơdroăng cheăng kâ hơ’lêh kơhnâ khât. Mơgêi rôh pêi cheăng, pôa Phạm Minh Chính, Ngế pro xiâm hnê ngăn tơnêi têa khĕn kơdeăn mâu ivá mơ-eăm ƀă mơnhên tối khât klêi kơ’nâi ki Đảng ƀô̆, Khu kăn pơkuâ ƀă Kuăn pơlê Long An hiăng pei pro klêi tung pêi pro hnoăng cheăng mơnhông cheăng kâ rêh ối pơlê pơla tung pơla hdrối kố nah.

‘Na troăng tơmiât mơnhông dêi Long An, Ngế pro xiâm hnê ngăn tơnêi têa mơhno nhên, Long An kal pêi pro châ tơƀrê mâu tơdroăng cheăng tung la ngiâ ki kal vâ bro ivá mơnhông tơƀrê, krá tơniăn, mơdêk ivá tíu ối dêi Long An ngăn tung mâu tíu cheăng ki xiâm cho pêi chiâk deăng kong kế cho ki xiâm; Kơmăi kơmok ngiât, kơmăi kơmok chal nếo, mơjiâng bro kế tơmeăm, on tơhrik cho ki xiâm; Tơdroăng ki tê mơdró cho ivá, ăm Long An chiâng tíu ki pơtroh kế tơmeăm tung kơpong.

Tơdrêng amê hlối tí tăng châ tơƀrê mâu tơdroăng ki hiăng ai hlâu, ki pơxúa; tơdjêp tơƀrê ƀă tíu xiâm cheăng kâ Pơlê kong kân Hồ Chí Minh ƀă kơpong Đông Nam Bộ; tí tăng ki pơxúa ‘na tíu tê tơdjêp ƀă Kul.