VOV4.Xơ Đăng - Klêi kơ’nâi séa ngăn nhên a mâu kong pơlê, kơvâ cheăng, tơdroăng tơkêa bro ki má môi, kơxo lơ 13/3, pôa Phạm Minh Chính, Ngế pro xiâm hnê ngăn tơnêi têa ƀă khu râ kăn pêi cheăng dêi Chin phuh hiăng pêi cheăng ƀă khu râ kăn pơkuâ xiâm kong pơlê Khánh Hòa. Kăn pơkuâ mâu khu xiâm, kơvâ cheăng Tơnêi têa tối, kong pơlê Khánh Hòa cho kong pơlê ai tíu ki kal ƀă ai tơmeăm mơnhông mơdêk, pơxúa kân tung mơnhông cheăng kâ – rêh ối pơlê pơla a kơpong Pá hdroh peăng Tơdế tơnêi têa ƀă Tây Nguyên, laga tá hâi xúa tâi tơmeăm ki ai hlâu, tơmeăm ki mơnhông tơtêk.

Tâi tâng a tíu pêi cheăng

Xông tơpui mơgêi a hneăng hôp, pôa Phạm Minh Chính, Ngế pro xiâm hnê ngăn Chin phuh tối rơdêi, Khánh Hòa ai tíu mơnhông tơtêk ton xŏn, ki rơhêng vâ tối kal ai khât tung mơnhông mơdêk cheăng kâ – rêh ối pơlê pơla ƀă gak kring cheăng lêng dêi tơnêi têa, Khánh Hòa kal hlê plĕng, pêi pro châ tơƀrê Pơkâ Hneăng hôp XIII dêi Đảng ƀă Pơkâ Hneăng hôp Đảng ƀô̆ kong pơlê; xúa, pêi pro tro troăng hơlâ dêi Đảng, troăng hơlâ luât dêi Tơnêi têa, tơdroăng hnê mơhno pơkuâ dêi Chin phuh.

Khánh Hòa kal mơnhông mơdêk ó rơdêi hiâm mơno rŭm môi tuăn, mơ-eăm xêh; Thăm klâ râ, klâ hnoăng, ngế krê pôu râng hnoăng cheăng ƀă hlối séa ngăn, pơkuâ hnoăng; ai troăng séa ngăn châ tơƀrê tơdroăng pêi pro dêi rêm râ.

A Sa Ly tơplôu ƀă tơbleăng