Xông tơpui a hneăng hôp, pôa Phạm Minh Chính, Ngế pro xiâm hnê ngăn tơnêi têa hiăng tối mâu tơdroăng lâp plâi tơnêi ƀă tung tơnêi têa ing mê tối nhên hnoăng dêi khu tê mơdró tơnêi têa, tung mê tối nhên: Mâu khu tê mơdró tơnêi têa thế veăng gum mơdêk ăm tơdroăng cheăng kâ rĕng rơdêi krá tơniăn djâ tơnêi têa mơnhông mơdêk xông kơneăng tung la ngiâ.

Thế pơhlêh tơmiât tung tuăn ngôa, troăng châ achê, troăng tơmiât, troăng pêi ƀă thế pêi pro ing tơdroăng ai khât nôkố, thế mơnhông ivá ó rơdêi dêi kuăn pơlê vâ veăng pêi pro; Thế séa ngăn, tơ’nôm pêi kêi đeăng pơkâ pêi; Thế djâ mâu pơkâ pêi troăng hơlâ vâ pêi lo liăn châ hên, vâ kơxô̆ liăn châ péa xôh, pái xôh, pro kế ki vâ mơdêk, pro tíu ki hgiên vâ pin xông tơtêk.

Ngế pro xiâm hnê ngăn tơnêi têa tối ăm ‘nâi, hơnăm 2025 ai kơnâ kal khât, cho hơnăm tơtêk, châ tơƀrê hluâ pơkâ, mơ-eăm tơtêk GDP châ ki vâ iâ 8%, mơjiâng tơdroăng ki xông tơtêk, mơjiâng tơdroăng ki rơdêi tung mâu hơnăm pơtối tơtêk 2 kơxô̆. Ƀă hnoăng ƀă kơxô̆ liăn, mơngế pêi cheăng dêi tơná Ngế pro xiâm hnê ngăn tơnêi pơkâ thế, mâu khu tê mơdró Tơnêi têa thế tơtêk djâ lâp tơnêi têa mơnhông rĕng ƀă krá tơniăn.