VOV4.Xơ Đăng - Kơxo lơ 5/4, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa pơkuâ hneăng hôp tiô troăng hyôh Internet tung lâp tơnei têa ‘na tơdroăng cheăng kâ rêh ối khế 3 ƀă 3 khế hơnăm 2022, tơbleăng tơdroăng ‘mâi mơnhông ƀă mơdêk cheăng kâ rêh ối, tơdroăng ƀă troăng rơhlâ mơdêk ki tơ-brê ‘na liăn ngân pơkâ liăn tâi tâng tơdroăng ‘no cheăng tung hơnăm 2022, tơdroăng tơbleăng mâu tơdroăng ‘na troăng prôk ki kal dêi tơnêi têa.

Rơtâ tá hneăng hôp hnê tối tung lâp tơnêi têa

Tơbleăng a hneăng hôp, pôa Phạm Minh Chính tối nhên, hâi lơ 5/1, Chin phuh po hneăng hôp mơ’no tơdrêng ƀă mâu kong pơlê ‘na tơdroăng mơnhông mơdêk cheăng kâ rêh ối hơnăm 2022, troh nôkố, pơ’lăng 3 khế klêi hneăng hôp mê, kal tối tơdroăng tơbleăng cheăng hơnăm 2022, ƀă ki tơmâng hbrâ pêi pro, mơ-eăm dêi kuăn pơlê, khu mơdró ing tơdroăng pơkâ dêi mâu kăn rêm râ. Ngế pro xiâm hnê ngăn tơnêi têa pơkâ thế, mâu kơ koan a xiâm tơnêi têa thế ai troăng rơhlâ teăng tơdrêng, kơdroh tơdjâk ‘mêi troh pơkâ má mơ’nui rơtế ƀă tơdroăng pro tơniăn cheăng kâ kân mâu tơdroăng pro tơdâng kân, mơjiâng cheăng kâ tơniăn.

Ngế pro xiâm hnê ngăn tơnêi têa pơkâ thế mâu kăn tơkŭm tuăn rơkê, hvái ngăn mâu túa cheăng ki hiăng châ pêi pro hdrối, hriâm ki tro, pơkâ troăng rơhlâ ing nôkố ta troh mơ’nui hơnăm vâ pêi mâu pơkâ dêi Kuô̆k hô̆i, Chin phuh, tối mơgêi hneăng hôp Tíu xiâm 4  khế 10/2021.

Gương tơplôu ƀă tơbleăng