A hneăng hôp mâu kăn teăng mâ tơkŭm tơpui tơno tơdrăng ‘na mâu tơdroăng xiâm tơdjâk troh pơkâ mơjiâng hngêi ối pơlê pơla châ pơcháu ăm mâu kong pơlê; troăng pơkâ pêi, troăng hơlâ ki tơvâ kal châ tơleăng; troăng mơhnhôk kơxô̆ liăn pêi pro; kơchuâ bro, khu hngêi ối pơlê pơla, tơdroăng pro mơ-éa...

Xông tơpui a hneăng hôp, pôa Phạm Minh Chính, Ngế pro xiâm hnê ngăn tơnêi têa tối ăm ‘nâi, troăng hơlâ dêi Đảng, Tơnêi têa mơhno cho nhên cho mơnhông rĕng laga krá tơniăn, ôh tá ăm hía tơdroăng ki plĕng rơkê, tơdâng tơ’mô, tŏng gum rêh ối pơlê pơla vâ tiô tơtêk cheăng kâ bu môi tơdroăng. Ngế pro xiâm hnê ngăn tơnêi têa tối nhên, thế kơjo hngêi ối pơlê pơla hdrối klêi mê nếo troh hngêi ối tê mơdró.

Hngêi ối pơlê pơla thế châ mơ’no liăn tơdâng tơ’mô mâu hngêi trăng, troăng klông, khăm pơlât, hnê hriâm, tơ’noăng ivá, rêh ối pơlê pơla, kong prâi... môi tiah hngêi ối tê mơdró, laga bu phá tơ-ê cho hngêi tơnêi têa xua châ troăng hơlâ tŏng gum. Ngế pro xiâm hnê ngăn tơnêi têa hiăng hnê mơhno inhên mâu troăng hiăng ƀă dế châ pêi pro môi tiah mơjiâng kơxô̆ liăn a tơnêi têa; mơ’no ăm mung liăn 140 rơpâu rơtal ăm hngêi ối pơlê pơla.