Tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa tối nhên hnoăng cheăng dêi troăng rơxế lơ treng ƀă tối tiah kố pro troăng rơxế lơ treng kô gum kal khât tung tơdroăng ki hâ ho a troăng prôk. Ngế pro xiâm hnê ngăn tơnêi têa tối nhên, Chin phuh hbrâ rơnáu xoăng liăn ăm tơdroăng tơkêa bro troăng rơxế lơ treng Lào Cai – Hà Nội – Hải Phòng ƀă tơdroăng tơkêa bro troăng rơxế lơ treng tơdrăng a troăng ing Kơnhŏng – Hdroh, pêi pro kơdĭng hrê 5% liăn tơnêi têa vâ pro 2 to troăng rơxế lơ treng kố, pơkâ thế mâu khu xiâm, kơvâ cheăng kong pơlê hbrâ rơnáu, rĕng ‘no liăn pêi cheăng.

Tung la ngiâ ah, Ngế pro xiâm hnê ngăn tơnêi têa pơkâ thế tơbleăng pêi mâu tơdroăng tơkêa bro athế rak vế krá, tro kih thuât, tơdroăng pro, tơƀrê. Mâu kơ koan pơtối mơhnhôk veăng tơlo hên kơxô̆ liăn tơbleăng pro mâu tơdroăng tơkêa, kal ai troăng hơlâ, troăng tŏng gum kơjo tơtro.

Ngế pro xiâm hnê ngăn tơnêi têa pơcháu ăm Vi ƀan hnê ngăn mâu kong pơlê, pơlê kong kân ai tơdroăng tơkêa bro troăng rơxế lơ treng prôk tơkâ tơkŭm hnê mơhno, mơdêk rĕng tơdroăng xo tơnêi, ‘mâi xê̆n hngêi trăng kih thuât, mơjiâng pro mâu kơpong pro pơlê ối ‘mâi xĕn ăm kuăn pơlê.