Xông tơpui a roh tơpui tơno, pôa Phạm Minh Chính, Ngế pro xiâm hnê ngăn tơnêi têa kheăn kơdeăn tơdroăng ki tối tơdrêng, mâu tơdroăng pói vâ, tâ rơrêk tung hiâm mơno dêi mâu khu tê mơdró Hàn Quốc, mơhno tơdroăng hlê plĕng, loi tơngah dêi pó. Ngế pro xiâm hnê ngăn tơnêi têa pói vâ mâu khu tê mơdró Hàn Quốc hiăng pêi lĕm tro laga thế pêi lĕm tro tâ mê nếo, hnê mơhno ăm Việt Nam mơnhông rĕng laga krá tơniăn môi tiah mâu pú hmâ hiăng hmâ pêi a tơnêi têa mâu pú hmâ, mơjiâng, veăng tơpui ‘na pơkâ pêi vâ tơniăn phuâng lĕm.

Tơdrêng amê pơtối po rơdâ mơ’no liăn cheăng tê mơdró a Việt Nam ƀă séa ngăn Việt Nam cho tíu ki pêt mơjiâng tơmeăm, mơ’no liăn cheăng, gum Việt Nam veăng trâu hơngế tâ tung tơdroăng mơjiâng pro ăm tơmeăm lâp plâi tơnêi, ai hên kơchơ mơdró, ai hên tơmeăm; kum hnê kŏng ngê̆ ăm Việt Nam; kum hnê mơjiâng mơngế pêi cheăng ki rơkê, rế hnê mơjiâng, hnê pơtâp, rế mơdêk ivá pêi cheăng, kum pơkuâ rơkê, pơhlêh tơtro khu pêi cheăng tơnêi têa ăm tơtro ƀă tơdroăng lâp plâi tơnêi ƀă dêi Việt Nam.

Ki rơhêng vâ tối cho mơ’no tung kơmăi kơmok khôi túa lĕm, kơmăi kơmok ‘na xah hêi, pơhlêh nếo tơmiât pêi rơkê, kŏng ngê̆ sinh hok, kŏng ngê̆ krúa lĕm kong prâi, kŏng ngê̆ kơxô̆, tuăn ngôa rơkê xua kuăn mơngế pro, kế ki chiâng mơ’no hrik hyôh.