Rôh hôp Khu pơkuâ xiâm Đảng khế 1/2025 hiăng pơkâ hên troăng, hên tơdroăng ki kal ‘na klâ xoăng, pro ‘nâng ‘nâi kơ koan cheăng tơnêi têa; ‘mâi rơnêu tơdroăng pơkâ thăm mơdêk hơnăm 2025 châ 8% tơngi klêng vâ mơnhông tơƀrê, mơ-eăm plah Túa pơkâ 5 hơnăm 2021 – 2025 ƀă pro ivá krá tơniăn, tơmiât troh pơkâ mơnhông péa kơxô̆ tung hneăng hơnăm 2026 – 2030.

Tơpui mơgêi rôh hôp, pôa Phạm Minh Chính, Ngế pro xiâm hnê ngăn tơnêi têa hiăng mơhno nhên mâu tơdroăng ki hiăng pêi klêi, tá hâi pêi tung khế 1, xiâm kối ƀă ƀai hriâm ki rơkê. Tung la ngiâ ah, Ngế pro xiâm hnê ngăn tơnêi têa pơkâ thế, séa ngăn nhên tung Pơkâ dêi Đảng, tơdroăng pơkuâ, hnê mơhno dêi Tơnêi têa, Khu xiâm pơkuâ tơdroăng kal kí, mâu kăn pơkuâ xiâm, vâ pro pơhlêh túa pơkâ, troăng prôk pêi pro dêi rêm râ, rêm kơvâ cheăng, rêm kong pơlê.

Athế ai ivá khŏm mơ-eăm kân, pêi pro kơtăng tơdroăng ki hiăng pơkuâ, kal athế rơdêi tâ nếo, pro ngế xiâm tung tơdroăng dế trâm, pêi pro tưƀrê tâ nếo; mơdêk tơbrê tâ nếo, malối cho tung pơkâ tơleăng mâu tơdroăng ki ai tơdjâk troh, tung kơpong; hbrâ rơnáu tối tơbleăng ƀă pơkâ mơ’no troăng hơlâ ăm mâu tơdroăng ki luâ hnoăng pơkuâ.