Kơxê măng lơ 5/3, Kăn pơkuâ ngăn Đảng ủi Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ po rôh Hôp dêi Đảng ủi Chin phuh tơbleăng hriăn ngăn, séa ngăn, mơ’no tơdroăng ki tơkŭm mâu tíu pêi cheăng râ kong pơlê, ôh tá tơkŭm a râ tơring, ‘mot tơkŭm mâu tíu pêi cheăng râ cheăm, tiô Mơgêi kơxô̆ 127 dêi Khu xiâm pơkuâ kal kí, Khu pơkuâ hnê ngăn Đảng ‘na tơbleăng hriăn plĕng, mơ’no pơtối xing xoăng tơkŭm kơ koan cheăng khu pơkuâ tơdroăng kal kí.

Klêi kơ’nâi hmâng pơchuât mâu kơxop hlá mơ-éa ƀă Đảng ủi tơpui tơno ‘na túa tơkŭm mâu tíu pêi cheăng râ kong pơlê, râ cheăm, mơgêi Rôh hôp, pôa Phạm Minh Chính, Ngế pro xiâm hnê ngăn tơnêi têa tối nhên, tơdroăng ki tơkŭm mâu tíu pêi cheăng râ kong pơlê, ôh tá tơkŭm pêi a tơring, ‘mot tơkŭm mâu tíu pêi cheăng râ cheăm athế séa ngăn tro ƀă tơdroăng mơgêi 127 dêi Khu xiâm pơkuâ tơdroăng kal kí, Khu pơkuâ ngăn Đảng. Tiah mê, tơkŭm khu kăn pơkuâ kong pơlê la ngiâ ah bu 2 râ tê, râ kong pơlê ƀă râ cheăm.

Ngế pro xiâm hnê ngăn Chin phuh pơchân tơdroăng tơkŭm mâu tíu pêi cheăng râ kong pơlê ƀă râ cheăm ôh ti xê rak tơniăn mâu tơdroăng pơkâ, tơdroăng pêi, tơdroăng tro ‘na tơnêi tơníu, pơ’leăng mâ mngế mê ối athế rak tơniăn tơdroăng cheăng ‘na tơnêi tơníu, cheăng kâ, pơlê pơla, túa lĕm tro ƀă ai tơdroăng tŏng gum dêi rơpó.