Tung pơla hdrối nah, Kuô̆k hô̆i hiăng pơkâ mâu tơdroăng Pơkâ ‘na troăng ‘no liăn pro troăng rơxế lơ treng a troăng ing peăng Kơnhŏng troh peăng Hdroh; Pơkâ ‘na troăng hơlâ ‘no liăn pro troăng rơxế lơ treng Lào Cai – Hà Nội – Hải Phòng ƀă Pơkâ ‘na tơdroăng pơkâ troăng hơlâ ki kal, malối cho vâ mơjiâng pro troăng rơxế lơ treng a pơlê kong kân Hà Nội, Pơlê kong kân Hồ Chí Minh.

Tung la ngiâ ah, pôa Phạm Minh Chính, Ngế pro xiâm hnê ngăn tơnêi têa tối tiah kố, hnoăng cheăng dêi Khu hnê mơhno cho hngăm hngo khât, kal pêi tơdrêng, pơkâ thế mâu ngế cheăng tung Khu hnê mơhno cheăng pơtối mơdêk hiâm mơno, tơdroăng pôu râng. Ngế pro xiâm hnê ngăn tơnêi têa pơkâ thế mâu khu râ Đảng, kăn pơkuâ kong pơlê tơbleăng cheăng xo tơnêi, ‘mâi xĕn mâu tơmeăm khoăng hngêi trăng; tung mê malối tơmâng ngăn troh cheăng pro pơlê ối, tŏng gum tơniăn pêi cheăng kâ vâ kuăn pơlê ai tíu ối, cheăng pêi ƀă túa rêh kâ ối nếo iâ hlái tơ’mô lơ tơniăn tâ tíu ối ki ton.