A rôh hôp, mâu ngế cheăng tung Chin phuh hiăng tơpui, tơno tơkŭm tung mâu tơdroăng ki kal, ăm rơkong veăng tơpui tối phá dêi rơpó kal pâ rơkong tơpui dêi Chin phuh ‘na: Luât On tơhrik trếo tik nik (‘mâi pơhlêh); Luât mơ’no hoăng têa; Luât Pơkuâ ngăn, mơjiâng kơphô̆; Luât Khoa hok kong ngê̆ ƀă pơhlêh nếo tơmiât pêi rơkê; Luât Xúa on tơhrik kơdĭng, tơƀrê; ƀă pơkâ thế mơjiâng pro Luât Khu mơdró kâ (‘mâi pơhlêh).

Tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa mơhno nhên: mơ-eăm pêi pro klêi luât cho mơ-eăm ăm tơdroăng mơjiâng; pêi pro tro hnoăng cheăng mơjiâng pro luât kô pro rôh tơ’lêi hlâu ăm mơjiâng. Ngế pro xiâm hnê ngăn tơnêi têa pơkâ thế tơdroăng ki chêh pro mâu hlá mơ-éa luât athế tơkŭm tuăn ngoâ rơkê, mơdêk hiâm mơno pôu râng, mâu hlá mơ-éa athế iâ ‘nâng ‘nâi, nhên, tơ’lêi hlê, tơ’lêi xúa, tơ’lêi  pêi, tơ’lêi mơnhên tối, tơ’lêi séa ngăn, athế rĕng tơbleăng, rế pêi, rế hlo mâu tơdroăng tơná pêi tá hâi tro, vâ chêh pro klêi.