Hôp tơpui tơno cheăng kâ châu Á - Thái Bình Dương (APEC) hơnăm 2027 ƀă dó inâi ‘’Tơdjêp, mơjiâng mâu tơdroăng cheăng kâ tâi tâng ƀă mơ-eăm xêh’’ kô cho tíu ki hdró ki kal, mơhno tíu cheăng dêi Việt Nam tung kơpong. Tơdroăng tơdah rơpâu kăn teăng mâ, khu râ kăn pơkuâ râ xiâm ƀă khu tê mơdró ing 21 tơdroăng cheăng kâ ối tung APEC kum Phú Quốc chiâng tíu ki xiâm dêi mâu roh kĭ tơkêa tê mơdró, mơjiâng tơrŭm cheăng pơla mâu kong têa cheăng kâ kro mơdrŏng.

Klêi kơ’nâi tơmâng mâu rơkong tơpui, Ngế pro xiâm hnê ngăn tơnêi têa pơkâ thế kong pơlê Kiên Giang thế tơdâng tơ’mô hâi khế, tơdroăng cheăng, hiâm mơno cho thế mơnhên nhên ‘na tơdroăng pro xôi, khu dêi mâu tơdroăng tơkêa bro cho vâ pêi ăm APEC. Ngế pro xiâm hnê ngăn tơnêi têa pơcháu hnoăng ăm pôa Bùi Thanh Sơn, Phŏ Ngế pro xiâm hnê ngăn tơnêi têa pơkuâ tơdroăng xiâm ƀă tơdroăng tơkŭm po hneăng hôp; pôa Nguyễn Chí Dũng, Phŏ Ngế pro xiâm hnê ngăn tơnêi têa pơkuâ hriăn plĕng mơ’no liăn mơjiâng pro hngêi trăng troăng klông; pôa Trần Hồng Hà, Phŏ Ngế pro xiâm hnê ngăn tơnêi têa pơkuâ tơdroăng tơdjâk troh pơhlêh xiâm kối xúa kong, tơnêi báu.