Kơxê hâi lơ 10/2, pôa Phạm Minh Chính, Ngế pro xiâm hnê ngăn tơnêi têa pơkuâ hôp rôh má 11 Khu hnê mơhno Mơgêi tơdroăng cheăng pêi tiô pơkâ kơxô̆ 18-NQ/TW dêi Tíu xiâm tơnêi têa. Rôh hôp mê tơkŭm tơmâng mâu tơdroăng hnê tối ‘na Tơdroăng tơkêa pro rế lĕm rah iâ mơngế cheăng tung kơ koăn Séa ngăn pro rế lĕm, iâ mơngế, pêi cheăng rơdêi, tơbrê, pơxúa.

Tung mê, séa ngăn ‘na pơkâ, luât pơkâ dêi tơdroăng rah pro rế lĕm mơngế pêi cheăng tung kơ koan séa ngăn; ‘nâi nhên hnoăng cheăng, tơdroăng cheăng pêi, túa rah mơngế pêi cheăng dêi khu xiâm tơnêi têa; Pơkâ thế tơkŭm mơngế cheăng kơvâ séa ngăn tiô 2 râ a Tíu xiâm tơnêi têa ƀă kong pơlê. Tơbleăng mơgêi rôh hôp, Pôa Phạm Minh Chính Ngế pro xiâm hnê ngăn tơnêi têa tối nhên, tơdroăng rah xoăng pro rế lĕm mơngế pêi cheăng tung kơ koan séa ngăn thế ngăn tơdroăng ki pơxúa dêi tơnêi têa, dêi kuăn pơlê mê  ki a hdrối.

Tơmâng mêi pro tro tiô troăng hơlâ, hnê mơhno dêi Đảng, tơniăn pơkâ kơdroh xiâm ƀă mơngế ki pêi cheăng ton hơnăm, mơdêk ivá pêi cheăng. Tơdrêng amê, tơdroăng xing xoăng pro rế lĕm mơngế cheăng ăm tơnêi têa thế tơkâ luâ mâu tơdroăng tơvâ tơvân, ki pá, ki bu bối tung tơkŭm po, pêi cheăng dêi kơ koan séa ngăn môi tiah nôkố. Ngế pro xiâm hnê ngăn tơnêi têa pơkâ thế Khu séa ngăn Chin phuh, Ngế xiâm ngăn mơngế pêi cheăng ƀă kơ koan ki tơdjâk troh thâ pê klêi tơdroăng tơkêa bro vâ pơtroh ăm Khu xiâm kal kí ƀă Khu hnê mơhno cheăng Xiâm séa ngăn ƀă hbrâ pơtroh ăm Kuô̆k hô̆i klêi Ngế xiâm ngăn tơdroăng kal kí hiăng hnê tối.