A roh tơpui tơno, teăng mâ mâu khu tê mơdró ƀă khu tơrŭm cheăng rơkâu mâu tơdroăng mơnhông cheăng kâ rêh ối pơlê pơla ki Việt Nam hiăng châ tơƀrê tung mâu hơnăm hiăng hluâ, cho tíu ki eăng ‘na tơtêk lâp plâi tơnêi. Tơdrêng amê kheăn kơdeăn tíu mơ’no liăn cheăng tê mơdró a Việt Nam rế hía rế châ pơhlêh lĕm ƀă cho tíu troh mơ’no liăn cheăng ki má môi tung lâp plâi tơnêi.

Mâu kăn teăng mâ xuân ai hên rơkong tơpui, pâ thế troh Chin phuh, Ngế pro xiâm hnê ngăn Chin phuh mâu tơdroăng ki tơdjâk troh pro mơ-éa, xo hnoăng mơhá, khu xo hnoăng mơhá tơmeăm tê rôe ngi kong têa ê, pơkuâ tuăn ngôa rơkê, khoa hok kŏng ngê̆... ƀă pói vâ pơtối mơ’no liăn cheăng a Việt Nam tung kơvâ on tơhrik ki má lối cho on tơhrik kơtâu ƀă khía a tung dế têa kơxĭ, on tơhrik kơtâu ƀă mâ hâi...

Xông tơpui a roh hôp, pôa Phạm Minh Chính, Ngế pro xiâm hnê ngăn tơnêi têa mơnê khu tê mơdró Châu Âu hiăng ngăn Việt Nam môi tiah pơlê xiâm dêi tơná vâ mơ’no liăn cheăng tê mơdró. Ngế pro xiâm hnê ngăn tơnêi têa pói vâ mâu khu tê mơdró Châu Âu  pơtối mơ’no liăn cheăng a Việt Nam. Ngế pro xiâm hnê ngăn tơnêi têa mơnhên, Việt Nam hbrâ tah lôi mâu pá puât tơvâ tơvân, pro tơ’lêi hlâu vâ khu tê mơdró EU mơ’no liăn mơnhông mơdêk.