Xông tơpui a roh hôp, pôa Phạm Minh Chính, Ngế pro xiâm hnê ngăn tơnêi têa mơnê tơdroăng ki tối tơdrăng dêi mâu khu tê mơdró kong têa Sinuâ, mơhno tơdroăng tuăn pâ, hnoăng cheăng, tơdroăng ki tá hiâm mơno ƀă cho khu tê mơdró pêi cheăng kâ lĕm tro, rơkê.

Ngế pro xiâm hnê ngăn tơnêi têa pói vâ mâu khu tê mơdró kong têa Sinuâ mơnhông mơdêk Việt Nam chiâng tíu pêt mơjiâng tơmeăm, gum mơnhông cheăng kâ xúa kŏng ngê̆, cheăng kâ krúa lĕm, cheăng kâ đi đo tiah mê, mơnhông rĕng ƀă krá tơniăn; tê mơdró lĕm tro, tro luât, vâ tơmâng rơkong tơpui tối dêi pó, tối dêi pó troăng pêi hơngế, tối dêi pó tơdroăng pêi cheăng, thăm pơcháu hnê kŏng ngê̆ ăm Việt Nam, tŏng gum Việt Nam ing khu tê mơdró kŭn mơnhông chiâng khu tê mơdró kân, tuăn ngôa ki rơkê xúa kŏng ngê̆ mơnhông, veăng mâu tơdroăng ki kơnía lâp plâi tơnêi.

Ngế pro xiâm hnê ngăn tơnêi têa pói vâ mâu khu tê mơdró Sinuâ tŏng gum Việt Nam tiô tơdroăng ki pơxúa tơtro, tối ăm dêi pó tơdroăng ki pá vâ ví, tơxâng tơrŭm cheăng pơla péa tơnêi têa.