Ngế pro xiâm hnê ngăn tơnêi têa mơnhên tối, klêi kơ’nâi 76 hơnăm mơjiâng ƀă mơnhông, Học viện Quân y hiăng tối nhên hnoăng cheăng cho môi tung mâu hngêi trung đăi hok y dược ki xiâm, malối cho tung tơdroăng ki hnê mâu ngế cheăng pro ƀok thái pơkeăng ki rơkê plĕng, hriăn ngăn y dược học cheăng lêng, hnê kih thuât y dược ƀă cho tíu xiâm pơlât ki rơkê má môi.

Mâu rơxông ƀok thái pơkeăng ƀă sinh viên Học viện Quân y hiăng pro rơ-eăng inâi ăm kơvâ Quân y xuân môi tiah tơdroăng cheăng khăm pơlât y học dêi tơnêi têa pin. Ngế pro xiâm hnê ngăn tơnêi têa mơhno nhên, tung la ngiâ, Học viện Quân y pôi tá pơtê mơnhông ƀă hnoăng cheăng cho môi tung mâu hngêi trung đăi hok y dược xiâm dêi Việt Nam, cho môi hngêi trung Đăi hok ki kal dêi Tơnêi têa; chiâng tíu xiâm hnê cheăng pêi, hriăn ngăn ‘na khoa hok, mơnhông ƀă xúa mâu kih thuât ki rơkê plĕng tung mâu kơvâ y hok cheăng lêng ƀă y hok tơdjuôm dêi tơnêi têa ƀă kong têa ê.