A roh tơdah pôa Khuất Đông Ngọc, Kăn xiâm pơkuâ Khu tơrŭm pêi chiâk deăng ƀă Kế kâ Khu lâp kong têa (FAO), pôa Phạm Minh Chính, Ngế pro xiâm hnê ngăn tơnêi têa mơnhên Việt Nam kheăn kơdeăn tơrŭm cheăng ƀă FAO tung plâ mâu hơnăm hiăng hluâ, ki má lối cho tung mơdêk mơnhông pêi chiâk deăng, thôn pơlê ƀă pơhlêh ‘na kế kâ krá tơniăn a Việt Nam.

Troh nôkố Việt Nam hiăng ai hên tơdroăng veăng kum ki kal ăm tơniăn bê kế kâ lâp plâi tơnêi, ki rơhêng vâ tối cho thăm tê ngi kong têa ê drêng mâu kong têa kơdroh tê ngi kong têa ê phái xua pơtê tot mâu tơdroăng tê ngi kong têa tung roh pơreăng kân COVID-19. Vâ mơdêk tơrŭm cheăng pơla péa pâ, Ngế pro xiâm hnê ngăn tơnêi têa pơkâ thế FAO pơtối tŏng gum, kum Việt Nam tung tơdroăng vêh pơhlêh kơvâ pêi chiâk deăng tiô troăng mơdêk ki kơnâ tơtêk ƀă mơnhông krúa lĕm, krá tơniăn, rơkê, hbrâ ví ƀă kong prâi hơ’lêh; pêi cheăng xúa kơmăi kơmok tâi tâng, tíu kơdrâm kuăn pơlê rêh ối tê mơdró thôn pơlê, mơnhông thôn pơlê ngiêt, krúa, lĕm; mơdêk pơhlêh xúa kŏng ngê̆.