Drêng veăng hôp mâu kăn xiâm ASEAN - Hô̆i đong tơrŭm cheăng kung King (GCC) ƀă lăm pôu kong têa Saudi Arabia sap hâi lơ 18-20/10, tiô rơkong krếo thế dêi pôa Salman bin Abdulaziz Al Saud, kăn xiâm dêi Saudi Arabia. Kơmăng hâi lơ 18/10, tiô chôu kong têa, pôa Phạm Minh Chính, Ngế pro xiâm hnê ngăn Chin phuh hiăng tơdah khu kăn dêi Grup Ajlan ƀă Bros. 

A rôh tơdah, pôa Ali Al- Khatib, Ngế phŏ pơkuâ Kŏng ti Ajlan ƀă Bros ăm ‘nâi, tung la ngiâ kŏng ti púi vâ kô po rơdâ tâ tơrŭm ‘no liăn cheăng a Việt Nam ƀă pâ thế Chin phuh Việt Nam ƀă mâu khu xiâm kơvâ cheăng pro tơ’lêi hlâu tâ nếo ăm kŏng ti châ po rơdâ ‘no liăn cheăng a Việt Nam.

Ngế pro xiâm hnê ngăn tơnêi têa tối, Chin phuh Việt Nam kô tơhrâ kô veăng rơtế ƀă, pro tơ’lêi hlâu ăm grup Ajlan ƀă Bros tung tơdroăng ‘no liăn cheăng tê mơdró ƀă po rơdâ tơrŭm ƀă mâu khu mơdró a Việt Nam ƀă Ngế pro xiâm hnê ngăn tơnêi têa púi vâ  tơdah khu Grup Ajlan ƀă Bros Việt Nam vâ mơhno ăm hlo mâu tơdroăng vâ ’no liăn cheăng dêi Kŏng ti a Việt Nam.