Mơnhên tơrŭm cheăng nhŏng o Việt Nam – Lếo ai kơnâ kal khât ƀă tơdroăng mơjiâng ƀă gâk kring Tơnêi têa dêi rêm tơnêi têa, Ngế pro xiâm hnê ngăn tơnêi têa tối ăm ‘nâi, Việt Nam đi đo pâ vế tơdroăng tŏng gum dêi Lếo tung tơdroăng gâk kring ƀă mơnhông krá tơniăn; đi đo môi tuăn, pro tơ’lêi hlâu má môi vâ tơrŭm cheăng pơla Khu lêng péa tơnêi têa rế hía rế mơnhông mơdêk.

Pôa Phạm Minh Chính, Ngế pro xiâm hnê ngăn tơnêi têa pơkâ thế Khu lêng péa tơnêi têa thăm tơrŭm, tơbleăng châ tơƀrê ƀă khu râ kăn pơkuâ péa tơnêi têa ‘na gâk kring tơnêi têa, gâk kring tơniăn pơlê pơla; pêi pro ó rơdêi tơdroăng châ tơƀrê dêi Roh trâm pơla khu râ kăn pơkuâ Đảng pá kong têa ƀă pái Ngế pro xiâm hnê ngăn kong têa Kul – Lếo – Việt Nam a pơlê kong kân Hồ Chí Minh khế 2 pơla kố nah, thăm krá tơniăn tơrŭm krá pơla 3 kong têa; pêi pro mâu pơkâ tơrŭm cheăng ki dế ai nôkố.