A rôh tơdah, pôa Phạm Minh Chính, Ngế pro xiâm hnê ngăn Chin phuh tối rơdêi, Việt Nam đi đo ngăn nhuô̆m mơnhông tơrŭm cheăng ƀă Hungary, Kong têa tơrŭm cheăng tŭm têk apoăng dêi Việt Nam a Trung Đông Âu. Pôa Phạm Minh Chính pơkâ thế péa pâ rak vế pơtroh khu râ kăn, malối cho khu râ kăn xiâm. Pôa Szijjártó Péter tối rơdêi Hungary púi vâ mơnhông rơdêi tâ nếo tơrŭm tơroâ khôi hmâ ƀă tơrŭm tung hen kơvâ cheăng ƀă Việt Nam, kong têa tơrŭm cheăng ki kal xiâm dêi Hungary a Đông Nam Á.

Tơpui ‘na mâu tơdroăng a kong têa ƀă tung kơpong ki péa pâ rơtế vâ ‘nâi, pôa Phạm Minh Chính prế pôa Szijjártó Péter môi tuăn péa tơnêi têa ai hên túa tơmiât tơdjuôm tung troăng hơlâ tơpui kâ, kal thăm mơnhông trâm mâ, pơtroh khu râ kăn, tơrŭm cheăng tung mâu rôh hôp; rơtế môi tuăn hơniâp lĕm, tơrŭm cheăng ƀă mơnhông pơtối cho troăng tơmiât pêi tơdjuôm hơniâp lĕm tung luât lâp plâi tơnêi, xua ki pơxúa dêi kuăn pơlê mâu hdroâng kuăn ngo.