Ngế pro xiâm hnê ngăn tơnêi têa tối tung pơla lâp plâi tơnêi ai tơdroăng rơiô nôkố, Việt Nam đi đo achê ƀă Cuba, tối ‘na tơdroăng cheăng ƀă tơdroăng kơjo kum Cuba tơkâ luâ xơpá, pơtối rak ki rơdêi dế tơná vâ  rơtế mơnhông. Ngế pro xiâm hnê ngăn Chin phuh pơkâ thế péa pâ mơdêk tơpui tơno tơrá khu kăn; tơrŭm krá tơbleăng mâu tơdroăng tơhrâ tơrá mâu kăn tiô tơdroăng tơpui pơla mâu kăn hiăng châ tơpui rơhéa tung rôh lăm pôu Cuba dêi pôa Tô Lâm, Kăn xiâm pơkuâ hnê cheăng Đảng khế 9/2024 nah.

Ngế xiâm tơpui kâ Cuba tối mơnê khât dêi Đảng, Tơnêi têa ƀă kuăn pơlê Cuba ‘na tuăn pâ ki môi tuăn ƀă veăng kum ai pơxúa khât dêi Việt Nam tung mâu hơnăm achê kố, malối tung kơvâ pêi chiâk ƀă rak tơniăn kế kâ. Péa pâ vâ môi tuăn tơrŭm tơbleăng khât, tơƀrê mâu tơdroăng tơrŭm cheăng, tê mơdró, ‘no liăn cheăng ƀă hên kơvâ tơrŭm ki ê mơnhông tơxâng  ƀă tơdroăng tơrŭm cheăng kal kí malối, pêi ai pơxúa ăm tơdroăng mơnhông cheăng kâ dêi péa tơnêi têa.