VOV4.Xơ Đăng - Kơxo lơ 17/3, pôa Phạm Minh Chính, Ngế pro xiâm hnê ngăn tơnêi têa hiăng tơdah ngế xiâm tơpui kâ xuân cho nho\ng o pơtáu kong têa Saudi Arabia, cho pôa Faisal Bin Farhan Al Saud troh koh hmât tơpui tơno. Tơpui a rôh tơdah, Ngế xiâm hnê ngăn Chin phuh pơkâ thế péa tơnêi têa mơdêk tơrŭm pơtroh mâu khu râ kăn ƀă trâm mâ pơla kăn xiâm pơkuâ péa tơnêi têa; mơdêk tơrŭm pơla khu xiâm tơpui kâ ƀă tŏng kum mâu tơdroăng cheăng, trâm mâ, mơhno túa lĕm tro pơla péa tơnêi têa.

Tâ tá rôh tơdah

Ngế pro xiâm hnê ngăn tơnêi têa pơkâ thế peăng Saudi Arabia rĕng tah lôi mâu tơdroăng mơdât tơdroăng ki roê xo ká xi xŏng dêi Việt Nam, mơdêk roê mâu kế tơmeăm pêi lo ing chiâk deăng dêi Việt Nam, po rơdâ kơchơ mơdró ƀă mâu kế tơmeăm dêi rơpó, tơbleăng ăm dêi rơpó mâu tơdroăng ki rơkê plĕng ăm Việt Nam châ xúa mâu kế tơmeăm ƀă tê mơdró tiô pơkâ Islam Halal, pro tơ’lêi hlâu ăm mâu khu mơdró kâ Việt Nam veăng tung tơkêa tê têa châu têa kơxăng a Saudi Arabia ƀă ai rôh tơpui tơ’no ‘na tơdroăng kal, tối ki rơkê plĕng ƀă mâu khu ki tơrŭm cheăng Saudi Arabia tung mâu kơvâ cheăng ki pro kơdroh tah têa xăng po, on tơhrik ƀă kơmăi kơmok.

Katarina Nga tơplôu ƀă tơbleăng