VOV4.Xơ Đăng - Kơmăng lơ 15/2, pôa Phạm Minh Chính, Ngế pro xiâm hnê ngăn tơnêi têa hiăng tơpui phôn ƀă pôa Albert Bourla, Kăn hnê ngăn, Kăn xiâm pơkuâ Grup Pfizer. A roh tơpui phôn, pôa Phạm Minh Chính mơnê, kheăn kơdeăn Grup pơkuâ Pfizer ƀă Kăn hnê ngăn Pfizer tung pơla kố nah hiăng tơrŭm châ tơƀrê ƀă mâu kơ koan dêi Việt Nam vâ pêi kêi đeăng mơjiâng pro rĕng pơtroh ăm ƀă tŭm 51 rơtuh kong kếo vaccine COVID-19 ăm Việt Nam tiô pơkâ dêi Việt Nam a roh tơpui phôn ƀă Ngế pro xiâm hnê ngăn tơnêi têa hâi lơ 20/8/2021.

Pôa Phạm Minh Chính, Ngế pro xiâm hnê ngăn tơnêi têa tơpui phôn ƀă Kăn hnê ngăn, Kăn pơkuâ Grup pơkuâ Pfizer

Pôa Phạm Minh Chính tối ăm ‘nâi, pơla kố nah Việt Nam hiăng rôe vaccine dêi Pfizer pâk ăm vâi hdrêng sap ing 12 – 17 hơnăm, troh nôkố, trum má 1 châ vâ chê 96%, trum má 2 châ vâ chê 90% ƀă kố cho tơdroăng ki mơ-eăm kân. Tơdroăng kố kum vâi hdrêng hmiân tuăn ƀă tơniăn, Ngế pro xiâm hnê ngăn tơnêi têa pơkâ thế Kăn hnê ngăn, Kăn pơkuâ Pfizer tơmâng thăm rĕng pêi pro tro tơdroăng mơjiâng pro pơtroh ăm 22 rơtuh kung kếo vaccine ăm vâi hdrêng sap ing 5 troh pá kơdâm 12 hơnăm a Việt Nam tung mâu hâi la ngiâ.

A Sa Ly tơplôu ƀă tơbleăng