VOV4.Xơ Đăng - Kơxê lơ 1/3, pôa Phạm Minh Chính, Ngế pro xiâm hnê ngăn Chin phuh hiăng tơpui phôn ƀă pôa Kasper Rosted, Kăn xiâm pơkuâ Grup pơkuâ Adidas vâ tơpui tơno ‘na troăng thăm pêi pro tơdroăng mơjiâng pro tơmeăm, tê mơdró dêi adidas a Việt Nam. A roh tơpui phôn, Ngế pro xiâm hnê ngăn tơnêu têa tối loi tơngah Grup pơkuâ adidas kô châ tơƀrê kân tâ mê nếo ƀă pơtối thăm pêi pro tơdroăng mơjiâng pro tơmeăm khoăng tê mơdró a Việt Nam, tá tơdroăng pro tơ’lêi hlâu ăm mâu khu tê mơdró Việt Nam veăng trâu hơhngế tâ tung tơdroăng mơjiâng pro tơmeăm ăm lâp plâi tơnêi dêi adidas.

Pôa Phạm Minh Chính, Ngế pro xiâm hnê ngăn tơnêi têa

Ngế pro xiâm hnê ngăn tơnêi têa pơkâ thế Grup pơkuâ pơtối mơnhông mơdêk hnoăng pơlê pơla dêi khu tê mơdró, tơmâng tơniăn pơxúa ƀă tơdroăng pêi cheăng lĕm má môi ăm mơngế pêi cheăng Việt Nam. Ngế pro xiâm hnê ngăn tơnêi têa tối kơjo dêi Chin phuh Việt Nam ‘na tơtêk mơjiâng tơmeăm khoăng krúa lĕm kong prâi, kơdroh mơ’no trếo ‘mêi ƀă kheăn kơdeăn tơkêa dêi Adidas ‘na mơjiâng pro tơmeăm khoăng tê mơdró krá tơniăn ƀă rak vế kong prâi, xúa on tơhrik châ tơƀrê hôm.

Ngế pro xiâm hnê ngăn tơnêi têa tối pói vâ Adidas kô pơtối veăng kum thăm tơrŭm cheăng kâ – tê mơdró – mơ’no liăn cheăng pơla Việt Nam ƀă Kong têa Alơmăng ƀă Khu tơrŭm châu Âu.

A Sa Ly tơplôu ƀă tơbleăng