Rôh hôp WEF Davos rôh kố cho môi tơdroăng ki kal vâ mâu kăn pơkuâ tơdroăng kal kí ƀă khu mơdró kâ tung lâp plâi tơnêi rơtế ƀă mâu kăn teăng mâ mâu khu tơrŭm pơlê pơla trâm mâ vâ tơpui tơno ‘na tơdroăng tơdjâk dêi pơlê pơla rơkê plĕng. Tiah mê, a rôh hôp mâu kăn tơkŭm tơpui tơno ‘na mâu tơdroăng ki tơdjâk troh tuăn ngoâ ki mơjiâng pro ƀă tơdroăng mơnhông cheăng kâ, tơdroăng mơnhông pơhlêh xúa kơmăi kơmok, mơjiâng mâu ngế cheăng ƀă mơdêk ivá tơbriât dêi mâu ngế pêi cheăng tung mâu hngêi kơmăi ƀă khu mơdró kâ, xuân môi tiah ‘mâi mơnhông tơdroăng loi a mâu kong têa tung lâp plâi tơnêi.

Tung rôh ăm pêi cheăng kố, pôa Phạm Minh Chính, Ngế pro xiâm hnê ngăn tơnêi têa kô ai rôh trâm pơla péa pâ ƀă kăn xiâm pơkuâ kong têa Swiss vâ tơpui ‘na mâu troăng hơlâ thăm mơdêk tơrŭm cheăng pơla péa pâ ƀă mơdêk tơrŭm cheăng pơla péa tơnêi têa, tơdrêng amê hlối tŏng gum mâu troăng hơlâ, kăn pơkuâ mâu kong têa, mâu khu tơrŭm kong têa ê, khu mơdró kâ, mâu khu ki ‘no liăn cheăng ki kân tung lâp plâi tơnêi.