VOV4.Xơ Đăng - Pôa Phạm Minh Chính, Ngế pro xiâm hnê ngăn tơnêi têa hâi lơ 6/3 veăng Hneăng hôp thăm mơnhông mơdêk pêi chiâk deăng tơbăng kroăng Cửu Long kâi trâng ƀă kong prâi hơ’lêh a kong pơlê Kiên Giang. Tơdroăng kố xua Khu xiâm pơkuâ ‘na pêi chiâk deăng ƀă Mơnhông mơdêk thôn pơlê ƀă 13 kong pơlê, pơlê kong kơdrâm kơpong Tơbăng kroăng Cửu Long tơrŭm tơkŭm po. Hneăng hôp thăm mơnhông mơdêk krá tơniăn tơbăng kroăng Cửu Long kâi trâng kong prâi hơ’lêh cho tơdroăng ki kal, păng ‘nâng tung pêi pro inhên, thăm mơnhông ó rơdêi tâ mê nếo tơdroăng pêi pro Pơkâ Hneăng hôp má XIII dêi Đảng ƀă mâu Pơkâ, troăng hơlâ kân dêi Đảng, Tơnêi têa, Chin phuh ‘na mơnhông mơdêk pêi chiâk deăng. Tiô pơkâ mơnhông mơdêk tơbăng kroăng Cửu Long troh hơnăm 2025 châ kơlo tơtêk GDP pêi chiâk deăng châ lối 3%/hơnăm. Pêi lo liăn rêm pơ’leăng mâ mơngế kơpong thôn pơlê tâk ki vâ iâ má môi 2 xôh tâng pơchông ƀă hơnăm 2018. Xông tơpui a roh hôp, pôa Phạm Minh Chính tối nhên, tíu pêi cheăng, hnoăng cheăng dêi tơbăng kroăng Cửu Long rak tíu cheăng ki kal má môi tá ‘na kal kí, cheăng kâ, rêh ối pơlê pơla, gâk kring cheăng lêng, tung trâm mâ tơpui tơno ƀă mâu kong têa ASEAN ƀă kơpong têa kroăng Mê Kông. Ngế pro xiâm hnê ngăn tơnêi têa pơkâ, xúa tơmeăm ki ai hlâu vâ mơnhông mơdêk pêi chiâk deăng châ tơƀrê hên, thôn pơlê tiô rơxông nếo, kuăn pơlê rơkê; mơnhên kuăn pơlê cho tíu xiâm, thôn pơlê cho xiâm kối, pêi chiâk deăng cho ki xiâm; hbrâ kâng trâng ƀă kong prâi hơ’lêh, thế tơrŭm krá tơniăn pêi chiâk deăng, xúa kơmăi kơmok, tê mơdró. Kơmăi kơmok ƀă tê mơdró cho xiâm kối kum mơnhông mơdêk pêi chiâk deăng vâ châ hên kơxô̆ liăn tiô pơkâ.

A Sa Ly tơplôu ƀă tơbleăng