Kơmăng lơ 29/9, a Tíu pêi cheăng Chin phuh, klăng roh leh tơbâ 50 hơnăm mơjiâng tơrŭm tơpui kâ ƀă kong têa ê pơla péa tơnêi têa (1975 – 2025), pôa Phạm Minh Chính, Ngế pro xiâm hnê ngăn tơnêi têa hiăng ai roh tơpui phôn ƀă pôa Friedrich Merz - Ngế pro xiâm Kŏng hoa Liên bang Alơmăng tơpui tơno mâu troăng mơdêk tơrŭm cheăng ton xŏn Việt Nam – Alơmăng mơnhông rế hía rế păng ‘nâng, châ tơƀrê ƀă tâi tâng.

A roh hôp tơpui tơno, pôa Phạm Minh Chính, Ngế pro xiâm hnê ngăn Chin phuh pơkâ thế Alơmăng pơtối tơrŭm pêi pro châ tơƀrê Tơdroăng pơkâ tê mơdró tơ’lêi hlâu Việt Nam – EU (EVFTA), rĕng kĭ Tơdroăng pơkâ Tŏng gum mơ’no Việt Nam – EU (EVIPA), pro tơ’lêi hlâu tâ nếo ăm mâu khu tê mơdró péa tơnêi têa po rơdâ tơrŭm cheăng mơ’no liăn cheăng ƀă tê mơdró; djâ khoa hok kŏng ngê̆ ƀă pơhlêh nếo tơmiât pêi rơkê chiâng môi tíu pêi cheăng nếo tung tơrŭm cheăng pơla péa pâ.

Péa pâ môi tuăn rĕng mơdêk tơrŭm cheăng pơla péa pâ to a kơlo hên tâ, pơtối thăm tơpui tơno râ kăn xiâm, mơnhông châ tơƀrê troăng tơrŭm cheăng dế ai nôkố, mơdêk mơjiâng mâu tôh pêi cheăng tơdjuôm tung mâu kơvâ cheăng kâ, kal kí, pêi cheăng.