Drêng tơbâ 76 hơnăm Hâi mố đô̆i rong râ - hlâ hía, tung rôh lăm pôu ƀă pêi cheăng a kong pơlê Dak Lak, kơxo hâi lơ 24/7, pôa Phan Đình Trạc, ngế xiâm pơkuâ khu tí tăng ‘nâi plĕng ăm tơnêi têa rơtế ƀă khu kăn ki pêi dêi hnoăng cheăng hiăng lăm troh a ilâng kiâ mố dô̆i kong pơlê ƀă troh pôu kơ-êng, mơhnhôk rơpŏng ki ai ngế hlâ drêng pêi dêi hnoăng cheăng a tơring Čư̆ Kuin, kong pơlê Dak Lak.

A hngêi mâu ngế ki hlâ mê, khu kố hiăng têk nhang tơbâ mâu kăn ƀô̆, lêng ki hiăng hlâ khên tơnôu xua tơdroăng tơniăn lĕm dêi kuăn pơlê; pôu kơ-êng, mơhnhôk ƀă pơtroh rơkong sĭng khéa troh mâu nhŏng o rơpŏng hngêi mâu ngế ki kố.

Tối ăm rơpŏng mâu kăn ƀô̆, lêng ‘na tơdroăng ki châi heăng kố, pôa Phan Đình Trạc, ngế xiâm pơkuâ tí tăng ‘nâi plĕng ăm tơnêi têa tối rơdêi, Đảng, Tơnêi têa, đi đo tơmâng ngăn, pêi pro tro mâu troăng hơlâ tŏng kum ƀă mâu kăn ƀô̆, lêng ki hlâ; ai hên tơdroăng ki mơhnhôk, hơlêm vâ nhŏng o rơpŏng hngêi vâi rĕng tơkâ luâ tơdroăng ki châi heăng kố.

Hdrối mê, Khu kăn ki pêi dêi hnoăng cheăng hiăng troh têk nhang, pleăng reăng a ilâng kiâ mố đô̆i kong pơlê Dak Lak.